Fatasöfnun Rauða krossins er orðin eitt mikilvægasta fjáröflunarverkefnið fyrir Hjálparsjóð Rauða kross Íslands. Afrakstur ársins 2010 var 60 milljónir króna sem greiddar voru í Hjálparsjóð, sem einkum er notaður til alþjóðlegs hjálparstarfs.

Rauðakrossbúðirnar gegna afar mikilvægu hlutverki í fjáröflun félagsins. Tíu ár eru liðin frá því fyrsta Rauðakrossbúðin var opnuð að Hverfisgötu í Reykjavík. Árið 2002 var búðin svo flutt að Laugavegi 12 þar sem hún er enn. Verslanirnar á höfuðborgarsvæðinu er nú fimm. Tvær eru á Laugaveginum, ein í Mjóddinni í Breiðholti, ein í Hafnarfirði og nýjasta viðbótin er Rauðakrossbúðin á Garðatorgi. Þá eru starfræktar Rauðakrossbúðir á Akureyri, Suðurnesjum, Borgarnesi, Grundarfirði, Eskifirði, Egilsstöðum, Stöðvarfirði og á Hornafirði.

Á höfuðborgarsvæðinu starfa um 200 sjálfboðaliðar á ári launalaust við söfnun, flokkun og sölu fatnaðarins. Þeir skiluðu á síðasta ári um 19.000 vinnustundum og reikna má með því að þetta framlag sjálfboðaliðanna sé ekki undir 30 milljóna króna virði. 

Þá úthlutaði Rauði krossinn fatnaði til 2.000 einstaklinga.