Lög Rauða kross Íslands

1. gr. Rauði kross Íslands
Félagið heitir Rauði kross Íslands. Það er landsfélag og innan þess starfa svæðisbundnar deildir sem mynda eina félagsheild. Aðsetur félagsins er í Reykjavík eða nágrenni.

Félagið er viðurkennt af Alþjóðaráði Rauða krossins og ríkisstjórn Íslands sem eina Rauða kross félagið er starfa má á Íslandi með þeim réttindum og skyldum sem því fylgja. Rauði kross Íslands er aðili að Alþjóðasambandi landsfélaga Rauða krossins og Rauða hálfmánans.

2. gr. Tilgangur félagsins
Rauði kross Íslands bregst við neyð jafnt innanlands sem utan og veitir aðstoð er gerir fólk hæfara til að takast á við erfiðleika og bregðast við áföllum. Félagið stendur vörð um mannréttindi og virðingu einstaklinga.

Rauði kross Íslands starfar eftir grundvallarmarkmiðum Alþjóðahreyfingar Rauða krossins og Rauða hálfmánans. Þau eru:

Mannúð
Alþjóðahreyfing Rauða krossins og Rauða hálfmánans, sem spratt upp af löngun til að veita þeim sem særst höfðu á orrustuvelli hjálp án manngreinarálits, reynir með alþjóðlegu starfi og starfi landsfélaga að koma í veg fyrir og létta þjáningar fólks hvar sem það er statt. Tilgangur hreyfingarinnar er að vernda líf og heilsu og tryggja virðingu fyrir mannlegu lífi. Hún vinnur að gagnkvæmum skilningi, vináttu, samstarfi og varanlegum friði meðal allra þjóða.

Óhlutdrægni
Hreyfingin gerir engan mun á milli manna eftir þjóðerni þeirra, uppruna, trúarbrögðum, kyni, stétt eða stjórnmálaskoðunum. Hún reynir að draga úr þjáningum einstaklinga og tekur þá eingöngu tillit til þarfa hvers og eins en veitir forgang þeim sem verst eru staddir.

Hlutleysi
Svo að hreyfingin megi áfram njóta almenns trausts, skal hún gæta hlutleysis í ófriði og aldrei taka þátt í deilum vegna stjórnmála, uppruna, trúarbragða eða hugmyndafræði.

Sjálfstæði
Hreyfingin er sjálfstæð. Þótt landsfélög veiti aðstoð í mannúðarstarfi stjórnvalda og lúti lögum lands síns, verða þau ætíð að varðveita sjálfstæði sitt svo þau geti starfað í samræmi við grundvallarmarkmið hreyfingarinnar.

Sjálfboðin þjónusta
Hreyfingin er borin uppi af sjálfboðnu hjálparstarfi og lætur aldrei stjórnast af hagnaðarvon.

Eining
Í hverju landi má aðeins vera eitt landsfélag Rauða krossins eða Rauða hálfmánans. Það skal vera öllum opið og vinna mannúðarstarf um landið allt.

Alheimshreyfing
Hreyfing Rauða krossins og Rauða hálfmánans nær um heim allan, og öll landsfélög hafa jafnan rétt og ábyrgð og sömu skyldur til gagnkvæmrar hjálpar.

3. gr. Merki félagsins
Merki Rauða kross Íslands er rauður kross á hvítum grunni í samræmi við Genfarsamningana og viðbótarbókanir við þá. Merkið skal nota í samræmi við reglur Alþjóðahreyfingar Rauða krossins og Rauða hálfmánans. Stjórn Rauða kross Íslands setur nánari reglur um notkun merkisins innan félagsins og á samstarf við stjórnvöld um vernd þess.

4. gr. Félagsaðild
Félagið er öllum opið. Árgjald félaga skal ákveðið á aðalfundi en haldast óbreytt taki aðalfundur ekki ákvörðun um breytingu. Félagar undir 18 ára aldri greiða ekki árgjald. Við sérstakar aðstæður getur deild undanþegið félaga frá greiðslu árgjalds.

Stjórn Rauða kross Íslands getur kjörið heiðursfélaga enda hafi viðkomandi látið félaginu í té þjónustu sem verð er viðurkenningar. Heiðursfélagar eru undanþegnir greiðslu árgjalds. Jafnframt getur stjórn Rauða kross Íslands veitt deildum eða einstaklingum viðurkenningar fyrir vel unnin störf.  

Félagar eru skráðir í eina deild Rauða kross Íslands að eigin vali. Félagar sem hafa greitt árgjald síðasta árs í deildinni fyrir 1. janúar hafa fullan atkvæðisrétt og kjörgengi á aðalfundi sinnar deildar. Stjórn deildar, eða kjörnefnd þar sem hún hefur verið skipuð, getur vikið frá þessu ákvæði ef næg framboð í nýja stjórn hafa ekki borist fyrir aðalfund. Heiðursfélagar og félagar sem eru undanþegnir greiðslu árgjalds hafa fullan rétt á aðalfundi. Félagi getur sagt sig úr Rauða krossi Íslands skriflega hvenær sem er.

Stjórn Rauða kross Íslands getur vísað félaga úr félaginu fyrir alvarlegar sakir, að höfðu samráði við viðkomandi deild, og skal það tilkynnt félaganum tafarlaust. Félagi, sem vísað hefur verið úr félaginu, getur skotið þeirri ákvörðun til sérstakrar nefndar, sem skipuð skal hverju sinni. Nefnd þessi skal skipuð 7 mönnum, formönnum svæðisráða og einum hæstaréttarlögmanni, sem skipaður skal af stjórn Rauða kross Íslands og skal hann jafnframt vera formaður. Niðurstaða nefndarinnar er endanleg og getur nefndin annað hvort staðfest ákvörðun stjórnarinnar um brottvísun eða fellt hana úr gildi.

Félagar skulu í störfum sínum fyrir félagið hafa grundvallarmarkmið Alþjóðahreyfingar Rauða krossins og Rauða hálfmánans í heiðri.

5. gr. Aðalfundur
Æðsta vald í öllum málefnum félagsins hefur aðalfundur Rauða kross Íslands sem haldinn skal fyrir miðjan júní ár hvert. Stjórn félagsins skal boða til hans með eins mánaðar fyrirvara í ábyrgðarbréfi til deilda. Aðalfundur er löglegur sé löglega til hans boðað.

Á aðalfundi ræður afl atkvæða úrslitum allra almennra mála. Til breytinga á lögum þessum þarf þó 2/3 hluta greiddra atkvæða.

Fulltrúafjöldi á aðalfundi miðast við íbúafjölda á starfssvæði deildar þannig að fyrir hverja 4.000 íbúa eða færri skal tilnefna tvo fulltrúa, fyrir íbúafjölda 4.001-8.000 skal tilnefna þrjá, fyrir 8.001-12.000 íbúa skal tilnefna fjóra og fyrir 12.001-18.000 íbúa fimm fulltrúa. Deildir á starfssvæði með 18.001-24.000 íbúa skulu tilnefna sex fulltrúa. Þar að auki skal tilnefna einn fulltrúa fyrir hverja 6.000 íbúa ef íbúafjöldi er á bilinu 24.001 til 78.000, einn fulltrúa fyrir hverja 8.000 íbúa ef íbúafjöldi er á bilinu 78.001-102.000, einn fulltrúa fyrir hverja 10.000 íbúa ef íbúafjöldi er 102.001 eða fleiri. Þó skal engin deild tilnefna fleiri fulltrúa á aðalfund en aðrar deildir til samans hafa rétt á. Íbúafjöldi miðast við mannfjöldaskrá Hagstofunnar 1. desember liðins árs.

Við sameiningu deilda skal hin sameinaða deild halda óbreyttum fjölda fulltrúa á næstu tveimur aðalfundum eftir sameiningu.

Eitt atkvæði fylgir hverjum fulltrúa og getur enginn fulltrúi farið með atkvæði í umboði annars.

Stjórnarmenn Rauða kross Íslands, formaður Ungmennahreyfingar Rauða kross Íslands og formenn svæðisráða eiga rétt til setu á aðalfundi og skulu þeir hafa þar fullt málfrelsi og tillögurétt. Stjórnarmenn og fastráðið starfsfólk Rauða kross Íslands geta ekki jafnframt setið aðalfund sem fulltrúar deilda.

Stjórn Rauða kross Íslands getur boðið einstaklingum sem ekki eru aðalfundarfulltrúar fundarsetu með tillögurétti og málfrelsi.

Einungis þær deildir sem hafa skilað samþykktum reikningum fyrir síðasta reikningsár hafa atkvæðisrétt á aðalfundi.

Deildir Rauða kross Íslands skulu eigi síðar en tveimur vikum fyrir aðalfund tilkynna stjórn Rauða kross Íslands um nöfn væntanlegra fulltrúa sinna og varamanna þeirra. Tillögur til lagabreytinga og allar meiri háttar tillögur sem ætlast er til að bornar séu upp á aðalfundi skulu sendar stjórn Rauða kross Íslands að minnsta kosti sex vikum fyrir aðalfund.

Stjórn Rauða kross Íslands skal eigi síðar en tveimur vikum fyrir aðalfund senda deildum tillögur að lagabreytingum, tilnefningar kjörnefndar og allar meiri háttar tillögur sem ætlast er til að verði bornar upp á aðalfundi.

Stjórnin boðar til aukaaðalfundar þegar þurfa þykir eða helmingur deilda óskar þess. Önnur ákvæði þessarar greinar og 6. gr. gilda um aukaaðalfund eftir því sem við á.

6. gr. Dagskrá aðalfundar
Á aðalfundi skulu tekin fyrir þessi mál

1. Stjórnin athugar kjörbréf fulltrúa deilda og leggur fram til úrskurðar fundarins
2. Fundarstjóri kosinn.
3. Fundarritari kosinn.
4. Fundargerð síðasta aðalfundar lögð fram til umræðu og staðfestingar.  
5. Skýrsla stjórnar Rauða kross Íslands um síðasta starfsár lögð fram til umræðu.
6. Endurskoðaðir reikningar síðasta reikningsárs lagðir fram til umræðu og atkvæðagreiðslu.
7. Fjárhagsáætlun næsta reikningsárs lögð fram til umræðu.
8. Framkvæmdaáætlun næsta starfsárs lögð fram til umræðu.
9. Lagabreytingar.
10. Kosning formanns samkvæmt 7. grein.
11. Kosning annarra stjórnarmanna og varamanna samkvæmt 7. grein.
12. Kosning tveggja skoðunarmanna.
13. Umræður um helstu stefnumál og markmið.
14. Önnur mál.

Formaður setur aðalfund og gengst fyrir kjöri fundarstjóra. Fundarstjóri getur jafnan leitað afbrigða frá röð dagskrárliða.

7. gr. Stjórn félagsins
Stjórn Rauða kross Íslands skal skipuð 11 mönnum og skal kjósa formann sérstaklega. Formaður og aðrir stjórnarmenn skulu kosnir til tveggja ára í senn þannig að helmingur er kosinn á hverjum aðalfundi. Að auki skulu kjörnir tveir varamenn til eins árs í senn og skal kjósa sérstaklega hvor er fyrsti varamaður og hvor annar. Boða skal varamenn á stjórnarfundi eins og kjörna stjórnarmenn og hafa þeir málfrelsi og tillögurétt en ekki atkvæðisrétt nema þeir sitji fundi í forföllum stjórnarmanna og skal þeim tilkynnt fyrirfram um slík forföll ef unnt er. Stjórnarmenn skulu, eftir að þeir hafa verið kjörnir í fyrsta sinn, skrifa undir yfirlýsingu þess efnis að þeir muni í störfum sínum fyrir félagið hafa grundvallarmarkmið Alþjóðahreyfingar Rauða krossins og Rauða hálfmánans í heiðri og vinna samkvæmt samþykktri stefnu félagsins. Fastráðnir starfsmenn félagsins geta ekki setið í stjórn.

Enginn getur setið samfellt í stjórn Rauða kross Íslands lengur en fjögur kjörtímabil, þ.e. átta ár í röð. Seta sem varamaður allt að fjórum árum skerðir ekki rétt til setu í stjórn í framangreindan tíma. Þá er heimilt að stjórnarmaður sé kosinn til allt að tveggja kjörtímabila sem formaður umfram fyrrgreind fjögur kjörtímabil. Ef stjórnarmaður hættir störfum skal varamaður taka sæti hans fram að næsta aðalfundi. Hafi fráfarandi stjórnarmaður verið á fyrra ári kjörtímabils skal á næsta aðalfundi kjósa stjórnarmann til eins árs í hans stað.

Stjórnin kýs sér varaformann, ritara og gjaldkera.

8. gr. Hlutverk stjórnar
Stjórnin fer með öll málefni Rauða kross Íslands milli aðalfunda. Hún ræður framkvæmdastjóra til fimm ára í senn og er endurráðning heimil.

Stjórnin skal skipa þriggja manna framkvæmdaráð sem í eiga sæti auk formanns tveir úr hópi stjórnarmanna og einn til vara. Hlutverk þess er að undirbúa stjórnarfundi og fjalla um ákvarðanir sem ekki þola bið. Því er skylt að gefa stjórn félagsins skýrslu um slíkar ákvarðanir á næsta stjórnarfundi. Framkvæmdaráð skal funda eins oft og þurfa þykir.

Stjórn Rauða kross Íslands skal eigi síðar en þremur mánuðum fyrir aðalfund skipa þriggja manna kjörnefnd sem undirbýr kosningar stjórnar og skoðunarmanna í samræmi við lög félagsins. Kjörnefnd skal skila rökstuddum tillögum til stjórnar Rauða kross Íslands eigi síðar en einum mánuði fyrir aðalfund. Stjórn Rauða kross Íslands setur almennar reglur um störf kjörnefndar.

Stjórnin skal gæta þess að deildir starfi samkvæmt grundvallarmarkmiðum Alþjóðahreyfingarinnar og lögum og stefnu Rauða kross Íslands. Stjórnin ber ábyrgð gagnvart félögum, almenningi og stjórnvöldum á starfi Rauða kross Íslands, jafnt landsskrifstofu sem deilda og annarra eininga innan félagsins. Jafnframt er henni skylt að aðstoða deildir við störf þeirra á hvern þann hátt sem henni er unnt, gæta hagsmuna þeirra í öllum málum og láta þeim í té allar upplýsingar er varða sameiginlega hagsmuni félagsins eða sérhagsmuni deildanna. Gefur hún deildunum skýrslu um þau mál sem almenna þýðingu hafa fyrir Rauða kross starfið. Einnig sér hún um skipulagða upplýsingamiðlun til deilda um starfsemi félagsins.

Stjórnin getur ákveðið að koma á fót starfshópum um einstök málefni og setur þeim vinnureglur með erindisbréfi.

Staða formanns Rauða kross Íslands er æðsta embætti landsfélagsins. Formaður leiðir starf Rauða kross Íslands samkvæmt samþykktum aðalfundar og ákvörðunum stjórnar.

Formaður boðar til stjórnarfunda og stýrir þeim.

Stjórnarstörf í þágu Rauða krossins eru ólaunuð.

9. gr. Fundir stjórnar
Reglulegir fundir stjórnarinnar skulu að jafnaði haldnir mánaðarlega en heimilt er að fella niður fundi í júní-ágúst.

Milli reglulegra funda skal stjórnin halda fundi þegar formaður, framkvæmdastjóri, í samráði við formann, eða minnst fjórir stjórnarmenn óska þess. Boða skal til funda í bréfi, með rafrænum hætti eða á annan sambærilegan hátt með minnst fimm daga fyrirvara nema sérstök atvik réttlæti skemmri frest.

Stjórnarfundur er lögmætur ef rétt er til hans boðað og að minnsta kosti sex stjórnarmanna eru mættir.

Á stjórnarfundi ræður einfaldur meirihluti atkvæða. Ef atkvæði falla jöfn ræður atkvæði formanns.

10. gr. Formannafundir
Stjórn Rauða kross Íslands skal boða til formannafundar árlega. Niðurstaða slíkra funda er ráðgefandi fyrir stjórn og aðalfund. 

11. gr. Málefnaþing
Stjórn Rauða kross Íslands skal boða til málefnaþings annað hvert ár, opið öllum félögum og áhugafólki um málefni félagsins. Tilgangur þingsins er að vera opinn vettvangur fyrir umræðu um helstu viðfangsefni Rauða krossins. 

12. gr. Framkvæmdastjóri og daglegur rekstur
Framkvæmdastjóri annast daglegan rekstur Rauða kross Íslands og framfylgir ákvörðunum aðalfundar og stjórnar félagsins ásamt öðrum verkefnum sem honum eru falin af stjórn. Hann gerir árlega verkefna- og fjárhagsáætlun fyrir landsskrifstofu og ber almenna ábyrgð gagnvart stjórn á framkvæmd hennar. Þá skal framkvæmdastjóri fylgjast með starfi deilda félagsins með það að markmiði að framkvæmd á stefnu Rauða kross Íslands nái til landsins alls. Hann skal sitja fundi stjórnar og framkvæmdaráðs með tillögurétti og málfrelsi.

Hinn daglegi rekstur tekur ekki til ráðstafana sem eru óvenjulegar eða mikils háttar. Þær getur framkvæmdastjóri aðeins annast samkvæmt sérstakri heimild frá stjórn Rauða kross Íslands nema ekki sé unnt að bíða ákvarðana hennar en þá skal ákvörðunin tekin í samráði við formann og aðra í framkvæmdaráði. Stjórn Rauða kross Íslands skal þegar í stað tilkynnt um slíka ráðstöfun.

Framkvæmdastjóri er yfirmaður landsskrifstofu og stýrir starfsmannahaldi. Hann ræður starfsmenn og segir þeim upp eftir því sem stöðuheimildir í fjárhagsáætlun gefa tilefni til. Framkvæmdastjóra ber að gera stjórn grein fyrir uppsögnum og ráðningum starfsmanna á næsta stjórnarfundi eftir slíka ákvörðun.

Hlutverk landsskrifstofu er að afla hugsjónum og verkefnum Rauða kross Íslands stuðnings með upplýsingagjöf og markaðsstarfi, þjónusta deildir með fræðslu og verkfærum til þess að þær geti framkvæmt samþykkt verkefni, samræma vinnubrögð og miðla þekkingu, vinna að verkefnum á landsvísu, vinna að neyðar- og þróunaraðstoð í samvinnu við deildir félagsins og önnur landsfélög, vera tengiliður og málsvari fyrir félagið gagnvart ríkisstjórn og ráðuneytum og að vera tengiliður við önnur landsfélög og samstarfsaðila.

13. gr. Deildir félagsins
Hlutverk deilda er að framfylgja stefnu Rauða kross Íslands þannig að hún nái til landsins alls. Deildir sinna verkefnum sem eru í eðli sínu staðbundin og eru í samræmi við samþykkta stefnu félagsins jafnframt því að taka þátt í sameiginlegum verkefnum. Stjórnir deilda taka sjálfstæðar ákvarðanir í eigin málum en bera ábyrgð á ákvörðunum sínum gagnvart stjórn félagsins. Sérhver deild skal bera nafn Rauða kross Íslands og kenna sig við það svæði sem hún starfar á.

Heimilt er að stofna undirdeildir með ákvörðun aðalfundar deildar. Stofnun undirdeilda hefur engin áhrif á stöðu viðkomandi deildar innan Rauða kross Íslands.

14. gr. Stofnun og sameining deilda
Heimilt er að stofna nýja deild að fullnægðum eftirtöldum skilyrðum:
a) Að stofnun deildarinnar og undirbúningur hennar hafi verið samþykktur af og unninn í samráði við stjórn Rauða kross Íslands.
b) Að önnur deild hafi ekki höfuðstöðvar í þeim sveitarfélögum sem starfssvæði deildarinnar tekur yfir.
c) Að íbúar á starfssvæði deildarinnar séu 400 eða fleiri.
d) Að stofnfundur hafi verið haldinn og stofnendur verið 30 hið fæsta.
e) Að deildinni hafi verið settar starfsreglur í samræmi við lög og reglur Rauða kross Íslands.
f) Að aðalfundur Rauða kross Íslands hafi staðfest stofnun deildarinnar. Deildin verður hluti af Rauða krossi Íslands þegar staðfesting aðalfundar liggur fyrir.

Deildum er heimilt að sameinast og renna þá eignir viðkomandi deilda til sameinaðrar deildar. Stjórn Rauða kross Íslands skal setja reglur um sameiningu deilda.

15. gr. Félagsfundir, stjórnir og starfsmenn deilda
Deildir skulu halda almennan félagsfund á ári hverju sem jafnframt er aðalfundur. Skal fundurinn haldinn fyrir 15. mars.

Aðalfund skal boða bréflega eða á annan tryggilegan hátt með minnst einnar viku fyrirvara. Einnig skal aðalfundur tilkynntur til skrifstofu Rauða kross Íslands með sama fyrirvara.  Stjórn deildar getur skipað kjörnefnd sem undirbýr kjör stjórnar og skoðunarmanna í samræmi við lög félagsins. Almennan félagsfund annan en aðalfund skal boða bréflega eða á annan tryggilegan hátt með minnst þriggja daga fyrirvara.

Félagar undir 18 ára aldri hafa ekki atkvæðisrétt á aðalfundi en málfrelsi og tillögurétt.

Stjórn Rauða kross Íslands setur almennar reglur um störf deilda, stjórnir þeirra og skipulag. Stjórnar- og nefndarstörf í deildum eru ólaunuð.

Sérstakar starfsreglur deilda og breytingar á þeim skulu háðar samþykki stjórnar Rauða kross Íslands.

Stjórn deildar getur kjörið eða ráðið starfsfólk til að framkvæma áform sín. Fastráðinn starfsmaður getur ekki jafnframt setið í stjórn deildar.

16. gr. Afturköllun starfsréttinda deilda
Stjórn Rauða kross Íslands getur hvenær sem er til bráðabirgða svipt deild rétti til að starfa ef hún starfar andstætt grundvallarmarkmiðum hreyfingarinnar, lögum eða stefnu Rauða kross Íslands. Stjórn er einnig heimilt að svipta deild rétti hafi hún ekki haldið aðalfund í tvö ár og ekki skilað framkvæmdaáætlun, ársskýrslu eða ársreikningi.

Ákvörðun stjórnar Rauða kross Íslands um afturköllun starfsréttinda skal lögð fyrir næsta aðalfund Rauða kross Íslands til endanlegrar afgreiðslu.

Fulltrúi eða fulltrúar deildar sem svipt hefur verið starfsrétti til bráðabirgða njóta ekki atkvæðisréttar á aðalfundi við afgreiðslu á máli deildarinnar. Þess skal gætt að þeim gefist kostur á að tala máli deildarinnar áður en ákvörðun er tekin.

Eignir deildar sem lögð er niður skulu renna til Rauða kross Íslands.

17. gr. Svæðabundin samvinna deilda og ungmennastarf
Deildir skulu hafa með sér svæðisbundna samvinnu í því skyni að efla samvinnu deilda í almennu félagsstarfi og um einstök verkefni. Stjórn Rauða kross Íslands tekur ákvörðun um samstarfssvæðin og setur almennar reglur um svæðisbundna samvinnu.

Ungmennahreyfing Rauða kross Íslands starfar á landsvísu að verkefnum sem varða ungt fólk og eru í samræmi við stefnu félagsins. Landsfundur hreyfingarinnar er haldinn árlega með þátttökurétti allra félaga 35 ára og yngri. Stjórn hennar er kjörin á landsfundi og er formaður kjörinn sérstaklega.  Stjórn Rauða kross Íslands setur almennar reglur um starfsemi Ungmennahreyfingar Rauða kross Íslands. 

18. gr. Ráðstöfun tekna og fleira (breyting samþykkt á aðalfundi 2006)
Tekjur Rauða kross Íslands frá Íslandsspilum skulu skiptast þannig: 5,5% skiptast jafnt milli allra deilda, 26,5% miðað við íbúafjölda á starfssvæði deildarinnar, 40% renna í sameiginlegan kostnað, 3% í Sjúkrabílasjóð, 5% í Verkefnasjóð og 20% í Hjálparsjóð.

Við sameiningu deilda skal hin nýja deild halda sömu tekjum og hinar sameinuðu deildir hefðu haft næstu 36 mánuði eftir sameiningu.

Árgjöld félaga í Rauða krossi Íslands renna óskipt til viðkomandi deildar að frádregnum innheimtukostnaði.

Standi deild ekki skil á ársreikningi og skýrslu um störf sín ásamt framkvæmda- og fjárhagsáætlun getur stjórn Rauða kross Íslands stöðvað greiðslur til hennar.

Einnig getur stjórn Rauða kross Íslands stöðvað greiðslur til deildar ef hún í ársbyrjun á peningalegar eignir sem nema tveggja ára hlutdeild hennar í tekjum félagsins frá Íslandsspilum og ekki er gerð grein fyrir notkun þess fjármagns í framkvæmda- og fjárhagsáætlun. Þeim fjármunum sem af ofangreindum ástæðum renna ekki beint til deildar skal úthlutað til svæðisráðs á starfssvæði deildarinnar til eflingar svæðisstarfs. Verði afgangur af svæðasjóðum þessum að loknu starfsári, og hafi honum ekki verið ráðstafað til verkefna, rennur hann í Verkefnasjóð.

Deild getur ekki skuldbundið sig fjárhagslega fyrir hærri upphæð en sem nemur hlutdeild hennar í tekjum félagsins frá Íslandsspilum á síðastliðnum tveimur árum, nema með samþykki stjórnar Rauða kross Íslands.

Stjórn Rauða kross Íslands skal setja reglur um hlutverk Hjálparsjóðs og Verkefnasjóðs og úthlutun úr þeim.

19. gr. Reikningsár félagsins
Reikningsár Rauða kross Íslands og deilda er almanaksárið. Deildirnar skulu eigi síðar en 15. mars ár hvert senda stjórn Rauða kross Íslands ársreikning og skýrslu um störf sín, staðfest af aðalfundi deildarinnar. Standi deild ekki skil á þessum skýrslum til stjórnar Rauða kross Íslands getur stjórnin stöðvað greiðslur til hennar. Deildir og svæði skulu skila framkvæmda- og fjárhagsáætlun næsta árs auk fjögurra ára verkefnaáætlunar til landsskrifstofu eigi síðar en 10. nóvember.

Stjórn Rauða kross Íslands skal árlega endurskoða ársreikninga og bókhald tiltekins fjölda deilda sem valdar eru af handahófi. Deildum er skylt að veita stjórninni aðgang að bókhaldi sínu í þessu skyni.

Reikningar deilda skulu endurskoðaðir af löggiltum endurskoðendum fari árleg velta deildar yfir tiltekna fjárhæð í samræmi við almenna ákvörðun stjórnar Rauða kross Íslands hverju sinni. 

20. gr. Félagsslit
Nú telst rétt að leggja niður starfsemi Rauða kross Íslands og verður ákvörðun þar að lútandi aðeins tekin á aðalfundi. Um undirbúning og atkvæðagreiðslu á fundinum skal fylgja þeim reglum sem gilda um lagabreytingar.

Verði samþykkt að leggja niður starfsemi Rauða kross Íslands skal sá fundur sem það samþykkir ráðstafa öllum eignum Rauða kross Íslands og deilda hans í sem nánustu samræmi við tilgang félagsins.

21. gr. Gildistaka
Lög þessi öðlast þegar gildi.